ieune Prince, puis qu’il leur peut arriuer de vuider
leurs differens à la pointe de l’épee. Et ceux
qui pressés d’vn cruel desespoir, abbregent leurs
iours, passeroient aussi pour courageux, quoy
qu’ils soient indignes, de respirer le commun air
des viuans ? il est donc éuident, qu’il ne suffit pas
de verser son sang, ny de prodiguer inutilement
sa vie, pour meriter la gloire de plusieurs Siecles,
& pour posseder la Royale generosité ; il est besoin
de plus excellentes preuues, & de marques
plus glorieuses de courage, qui paroissent en leur
iour dans les Armées, où vn ieune Prince se peut
rendre recommandable, par mille, & mille
actions de vertu, où la victoire depend bien souuent
de sa personne, où il trouue autant d’admirateurs
de ses grandeurs, qu’il a de spectateurs de
ses proüesses : où il peut moissonner des Palmes,
& des Lauriers, en recompense de ses trauaux :
bref, il peut acquerir en vn moment, dans les
florissantes Armées, l’honneur & la gloire de
l’immortalité.