La Mère de Dieu, Pierre de (dit Bertius, Abraham) [1647], LES VERTVS ROYALES D’VN IEVNE PRINCE. , français, latinRéférence RIM : Mx. Cote locale : B_1_1.
-- 111 --
leurs volontés, par vn gouuernement raisonnable,
exempt de force, & de violence.
Les ieunes
Princes
fort susceptibles
de
la Royale
clemence.
Que sans la clemence Royale, le gouuernement
d’vn ieune Prince deuient
Tyrannique.
CHAPITRE XVIII.
IL n’est pas beaucoup difficile à montrer que la
Monarchie, priuée de la Royale clemence,
deuient tyrannique, puis que nous sçauons que
les Tyrans sont distingués des legitimes Souuerains,
en ce qu’ils abusent de l’authorité, que
Dieu leur a mise entre les mains, & la font seruir
à leurs propres inclinations. Les Tyrans se ioüent
de la vie des humains, comme de celle des bestes ;
ils commandent aux peuples, cõme à des sauuages,
nourris dãs les épaisses forests : ils couurent vne
ame brutalle, sous vne peau humaine. Les Tyrans
n’vsent iamais de pardon, & ne sont point
touchés de compassion des miseres de leurs subiects.
Ils ne veulent pas entendre parler de la misericorde,
& tiennent tousiours leurs espées prestes
à les moüiller dans le sang des innocens. Les
Tyrans sont les ennemis iurés de la nature, & ne
recherchent que la ruine de leurs semblables. Les
Tyrans sont odieux au Ciel, & à la terre, & leur
memoire est execrable à la posterité. Tels estoient
La Mère de Dieu, Pierre de (dit Bertius, Abraham) [1647], LES VERTVS ROYALES D’VN IEVNE PRINCE. , français, latin Référence RIM : Mx. Cote locale : B_1_1.
|