Ces deux personages se firent accompagner d’vn
Moyne Collecteur des aumosnes de Monserrat ; Ils allerent
touts trois ensemble à Fontaine-bleau, où ils furent presentez
à la Reyne Regente par Monsieur le Tellier, comme
s’ils eussent esté deputez où Ambassadeurs de Catalogne :
Et en cette qualité L’Abbé fit effrontement à sa Majesté
en langue Espagnole vne harangue remplie de plainctes
des Catalans, & en suitte presenta vn memorial escrit
contre ledit Seigneur Mareschal : Ces Calomniateurs iouërent
si bien leur jeu en cette occurrence, que dés le soir
Monsieur le Cardinal fit resoudre d’arrester prisonnier
Monsieur le Mareschal de la Mothe, & on publia pour
nouuelles par tout que sur les plaintes des peuples on l’estoit
de Catalogne & qu’on y enuoyoit en sa place Monsieur
le Comte d’Harcourt Viceroy.

On eust difficilement descouuert cette trahison, sans que
peu apres arriuerẽt en cour de veritables Ambassadeurs du
Principat, lesquels estonnez d’entendre tels discours contraires
à leurs instructions, qui estoient remplies des contentements
que tesmoignoit la Catalogne du gouuernement
de Monsieur le Mareschal de la Mothe, iugerent
à propos d’escrire à Messieurs les Deputez, & à Messieurs
du Conseil des cent de Barcelonne pour sçauoir s’ils
auoient donné charge à L’Abbé Sala & à Puiolar de faire
telles plainctes au nom du Principat contre ledit sieur Mareschal.
Ces Messieurs surent surpris & touchez de ceste
nouuelle. Ils desaduoüerent par acte public ceste imposture,
& manderent à leurs Ambassadeurs d’oster l’agence du
pays à Puiolar : Mais le Cardinal qui ne vouloit abandonner
vn homme qui l’auoit si vtilement seruy, fit dire par
Monsieur le Tellier aux Ambassadeurs que la Reyne Regente
vouloit que ledit Puiolar demeurast Agent : & depuis
en recompense de sa calomnie, il a esté faict Chanoine
de Parpignan. Au regard de l’Abbé Sala, sans autre
iustification le Cardinal le fit par Monsieur le Cõte d’Harcourt
restablir en Catalogne, ou depuis ou depuis les Viceroys