ce genereux peuple l’estime & l’affection qu’il auoit pour
mondit Sr le Mareschal de la Mothe son Vice-Roy.

Pline, au Panegirique de l’Empereur Trajan, dit : Que la
marque la plus infaillible que le Prince & la Republique puissent
auoir du bon gouuernement d’vn Magistrat, est le tesmoignage
d’vn peuple qu’il a gouuerné, apres qu’il ne le gouuerne
plus. Ces grands sentimens qu’ont les Catalans pour Mr le
Mareschal de la Mothe depuis qu’il est sorty de leur pays : Ces
desadueus publics qu’ils ont faits contre les calomniateurs,
sont de ce genre d’approbation que desiroit cét Autheur : &
des preuues certaines des seruices qu’il a rendu à l’Estat pendant
qu’il les a gouuerné.

Estant chose digne de remarque, que lorsque Mr le Mareschal
de la Mothe est muet & en prison, Dieu a ouuert la bouche
& remué la langue au peuple de Catalogne pour plaindre
ses disgraces, & publier les seruices qu’il a rendu à la Couronne
en les gouuernant. Ce peuple n’a pas plustost sceu que par la
Commission addressée au Parlement de Grenoble, mondit
Sieur le Mareschal estoit entrepris & accusé des choses qu’il
auoit faites pendant qu’il estoit son Vice-Roy, que non seulement
les grands & principaux Officiers du Pays, non seulement
Messieurs de la Deputation, le bras Militaire, les Corps
des Chapitres des Eglises, de l’Inquisition, des Religieux, les
Villes & Communautez ; mais les habitans des plus petits Villages
se sont addressez à Monseigneur le Prince, pour luy tesmoigner
combien la memoire du gouuernement de Mr le Mareschal
de la Mothe leur estoit en veneration.

Ce doit estre vne grande consolation à ce Gentil homme
dans sa disgrace, d’auoir pour sa conduite le plus glorieux
Tesmoin qui soit en l’Europe. Ce grand Prince qui est la
merueille de la France, & les delices de tous les Peuples qui
le connoissent, qui est incomparable, & qui s’est rendu l’estonnement
de toutes les Nations ; par tant de prises de Villes,
de Batailles & de Victoires, a sceu & veu en Catalogne
par la satisfaction des Peuples & gens de guerre, que Monsieur
le Mareschal de la Mothe estoit plus mal-heureux que
coulpable.