vne fleur tres odoriferante ; c’est vn arbre fructifere,
duquel les fruicts sont tres-sauoureux. Cet Ange reuolté,
préuaricateur & apostat, ne pouuant supporter
l’éclat de cette belle roze, comme le premier mobile
donne les mouuemens à l’ordre qui luy est inferieur,
de mesme il meut plusieurs esprits pour liurer la guerre
à Dieu, se voulant faire semblable à luy, comme il est
dit au Texte sacré : mais estant absorbé & delegué dans
ces lieux sous-terrains par le glorieux Archange sainct
Michel, Tutelaire de la France, cet esprit voragineux
ne pouuant plus se roidir contre son Createur, il fait
la guerre à ses creatures, & suscite des troubles, contentions
& diuorces parmy les hommes, afin que par
iceux il puisse introduire le peché, & les rendre ses
esclaues.

Et similis
ero altissimo
& sedebo.

Vous sçauez, MADAME, que plus vn bien est grand,
d’autant plus il est estimable ; la Paix est vn souuerain
bien, donc elle est souuerainement aimable ; elle est si
excellente, que le premier Ambassadeur a esté vn Ange
de lumiere, qui l’a apportée à tous les hommes de
bonne volonté és personnes des Pasteurs.

Aussi nostre Sauueur ne voulut prendre sa naissance
temporelle que sous le regne d’Auguste, comme il est
dit és saincts cahiers, à cause que c’estoit vn Empereur
debonnaire & pacifique, qui faisoit regner la Iustice,
accompagnée de ces deux Ancres sacrez, la Mansuetude
& la Misericorde. Et ces antecesseurs estoient militans,
belliqueux, tempestueux & tyrans, qui exerçoient
la vengeance & cruauté, & partant n’estoient
pas dignes de receuoir dans leur territoire & pendant
leur regne vn si riche depost. Il falloit donc vn homme
pacifique, pour receuoir vn Dieu de paix, lequel
pendant qu’il a vescu sur la terre, dans ses oracles &
adorables Sermons, il auoit tousiours en la bouche
(mesme és maisons où il faisoit ces sacrées demarches)
la paix, qu’il laissoit auec vne singuliere recommandation.

Augusto
regnante
Christus
natus est in
plenitudine
temporum.