miserables Ministres qui auez esté les allumettes de cet embrasement,
la cause de la rebellion, les autheurs de la fin
tragique de vostre Roy, & quoy pensez-vous que celuy qui
m’empesche maintenant de poursuiure mes plaintes,
plus auant, ne me permette pas la vageance, s’il vous à
laisse faire vne action de tigre, & pleine de cruauté, ne
vous imaginez pas qu’il le laisse sans punition, & si ie suis
à cette heure desnüé de moyens necessaires pour vous
faire repentir de vostre lascheté, i’espere que Dieu satisfait
par cette mort, aura pitié de moy & fera naistre des occasions
propres pour cela, ie les attends de sa diuine bonté, & i’espere
qu’il ne m’en frustera iamais, c’est à ce dessein que ie feray
doresnauant des vœux, protestant ou que ie mourray
vangé ou viuray sans consolation.

Ces paroles souuent interrompuës par de long sanglots,
& prononcés auec vehemence le mirent quasi hors de luy
mesme, & l’excez de sa douleur est tel qu’il ne se plaist plus
qu’en la retraitte à ruminer son infortune, priez Dieu qu’il
luy plaise le secourir & le conduire sur le throsne que sa
naissance Royalle luy a acquise, & que la malignité du sort
scache à luy nuire.