imaginé de posseder à toute eternité l’esprit
de nostre ieune Monarque par le moyen
des artifices du Manchiny. Aprenez qu’il y a
vne Prouidence dans le Ciel qui prend soin
de cet Estat, & qui écoute les prieres des peuples
que vous auez opprimez par des Guerres
horribles, & l’histoire aura honte de raconter
ce que vous auez fait de mal. Si vn Ancien
disoit qu’il estoit tres-facile de grauer les
noms des bons Empereurs dans le Chaton
d’vne bague, ah qu’il est bien plus vray de dire
qu’on y pourroit tracer toutes vos bonnes
actions, Commencez s’il vous plaist d’en faire
quelques-vnes, il vaut mieux tard que jamais,
comme dit le Prouerbe. Allez-vous en
ie ne dis pas ou, c’est le plus grand bien que
vous pouuez faire à la France, c’est vne grace
qu’elle attend de vous, Faites luy du bien vne
fois en vostre vie apres tant de cruautez qu’elle
a ressentie à vostre occasion. Ne vous imaginez
pas que ie vous taitte en enfant lors que
ie vous dis ces veritez. Ce sont là les termes
dont vous vous estez seruy aux Deputez, qui
vous asseuroient que le peuple vous haissoit
de malle mort. Cette façon de parler vous a
rendu ridicule, & l’on s’est estonné qu’vn Ministre
d’Estat d’ont toutes les pensées doiuent
estre hautes & éleuées, ait vsé de termes si bas.

Page précédent(e)

Page suivant(e)