Gondi, Jean-François Paul / [cardinal de Retz] [1649], SERMON DE S. LOVIS ROY DE FRANCE, FAIT ET PRONONCÉ DEVANT le Roy & la Reyne Regente sa Mere. PAR MONSEIGNEVR L’ILLVSTRISSIME & Reuerendissime I. F. Paul de Condy Archèuesque de Corinthe, & Coadjuteur de Paris: A PARIS DANS L’EGLISE DE S. LOVIS des PP. Iesuites, au iour & Feste dudit saint Louis, l’an 1648. , français, latinRéférence RIM : M4_79. Cote locale : C_10_11.
Page précédent(e)

Page suivant(e)

-- 9 --

l’impieté regne & triomphe par l’impunité dans la Ville Capitale de vostre
Royaume ? Non sine causa gladium Dei portas, vindex es in iram. Ce n’est pas
sans suiet que Dieu vous a confié l’espée de sa Iustice ; c’est pour vanger sa
cause & pour punir les crimes que l’on commet contre sa diuine Maiesté ; la
Clemence est la vertu des Roys, & sans elle les Princes les plus legitimes ne
sont comme point distinguez des tyrans : mais elle perd son lustre & son merite
quãd elle est employée pour tirer des mains de la Iustice ces noirs & ces
infames criminels qui se sont attaquez directement à leur Createur. S. I ouis
par vne grandeur de courage digne d’vn Heros veritablement Chrestiens
contre les maximes de la fausse politique, pardonna au Comte de la Marche
rebelle declaré, & qui par vn attentat estrange auoit porté les armes d’Angleterre
dans le sein de la France contre son Souuerain, & au mesme momẽt
contre toutes les regles de la fausse Clemence ; il fait percer la langue à des
blasphemateurs, peut-estre, & sans doute moins coupables que ceux de nostre
siecle. La noble impatience que la Reyne vostre mere sent en son ame
contre tout ce qui est peché, ne luy permettra pas asseurément d’attendre la
paix pour remedier à ces desordres ; & c’est l’vnique gloire. SIRE, que son
amour luy permet de vous enuier, mais i’aduoüe que la charité Chrestienne
ne demande qu’auec peine & qu’auec regret la punition des crimes, & qu’elle
en souhaitte plutost la conuersion. Ames impies & brutales, qui n’éclatez
que par des blasphemes, & qui toutefois éclatez ; qui ne cherchez que
de l’applaudissement que par des discours abominables, & qui toutesfois
en trouuez ; preuenez par vne seuere penitence le chastiment exemplaire
que la Iustice de Dieu & celle du Roy vous prepare ; & vous gladiateurs, qui
méme auec faste vous vous sacrifiez vous-méme tous les iours au demon, dérobez
vos testes au supplice, & vos ames aux enfers.

 

Le grand ordre que Saint Louis mit en son Royaume, attira sur luy les benedictions
du Ciel ; & comme la plus grande & la principale de toutes est
l’amour de Dieu, & la charité pour ses freres, il luy inspira ce vaste & pieux
dessein de secourir les Chrestiens de Ierusalem, opprimez par la tyrannie des
barbares ; & d’affranchir de leur puissance ces lieux cõsacrées par la Naissance
& par la Mort du Fils de Dieu. Et veritablement c’est icy où la parole me
manque, c’est icy où sans emprunter les figures de l’Eloquence humaine, sans
parler auec exageration, ie me sens obligé d’aduoüer que ie me trouue dans
l’impuissance d’acheuer le tableau de ce grand Monarque, les traits en sont
trop forts. Tantost ie le considere triomphant des perils de la mer attaquant
Damiette, prenant le premier terre à la teste de son armée à la veuë de ses
ennemis, faisant trembler l’Orient sous le poix de ses armes, tantost ie le regarde
perçant en deux batailles comme vn prodige de valeur, les rangs de
trouppes infidelles, & apres des efforts plus qu’humains, abbatu dans ls
troisiesme, moins par la multitude de ses ennemis que par la main de Dieua
qui veut esprouuer sa constance ; tantost ie le considere en sa prison, attirant l,
veneration des peuples les plus barbares par sa vertu, & foulant aux pieds
par la grandeur de son courage la vaste Couronne des Mahomettans, tantost
ie l’apperçois dans les Hospitaux de Syrie au retour de sa captiuité secourant

Page précédent(e)

Page suivant(e)


Gondi, Jean-François Paul / [cardinal de Retz] [1649], SERMON DE S. LOVIS ROY DE FRANCE, FAIT ET PRONONCÉ DEVANT le Roy & la Reyne Regente sa Mere. PAR MONSEIGNEVR L’ILLVSTRISSIME & Reuerendissime I. F. Paul de Condy Archèuesque de Corinthe, & Coadjuteur de Paris: A PARIS DANS L’EGLISE DE S. LOVIS des PP. Iesuites, au iour & Feste dudit saint Louis, l’an 1648. , français, latinRéférence RIM : M4_79. Cote locale : C_10_11.