Sçachez que vous estes Roy pour rendre la iustice, & que vous la deuez
esgalement aux pauures & aux Princes, & par vous & par vos Officiers, des
actions desquels vous rendrez compte à Dieu. Soulagez vostre Peuple, conseruez
sa franchise, escoutez ses plaintes, & inclinez d’ordinaire du costé
moins riche, par ce qu’il y a apparence qu’il est le plus oppressé ; faites-vous
iustice à vous-mesme dans vos interests ; afin que vos Officiers n’ayent pas
lieu de se persuader qu’ils vous puissent plaire en faisant des iniustices pour
vostre seruice. N’entrez iamais en guerre contre aucun Prince Chrestien,
que vous n’y soyez obligé par des considerations tres-presantes, pardonnez
les fautes qui ne regarderont que vostre personne, & soyez inexorable pour
celles qui toucheront la diuine Maiesté ; punissez les blasphemateurs, & ayez
auersion pour les heretiques ; soyez liberal de vostre bien, & soyez menagere
de celuy de vos suiets ; maintenez les bons Reglemens & les anciennes Ordonnances
de vostre Royaume, & corrigez auec soin les mauuais vsages ; ne
donnez iamais les Benefices qu’à ceux qui seront capables d’en faire les fonctions,
& d’en soustenir la dignité ; demeurez dans le respect que vous deuez
au saint Siege, & conseruez inuiolablemẽt les priuileges & les immunirez de
l’Eglise ; entendez souuent la Parole de Dieu, & ftequentez les Sacremens
auec les dispositions necessaires. Enfin, faites regner Iesus-Christ en vostre
cœur, & dans nostre Royaume, afin qu’apres vne longue vie, il vous fasse regner
auec luy dans la vie eternelle ; où vous conduise le Pere, † le Fils : † & le
S. † Esprit. Ainsi soit-il.