AV LECTEVR.
AMY Lecteur, la piece dont ie te fay present, toute
imparfaite qu’elle est, m’a cousté deux efforts, dont le
moindre estoit capable de lasser la foible industrie de mon
esprit, qui n’est pas des plus laborieux. L’vn de déchiffrer
vne Lettre assez longue, escrite en caracteres inconnus ; &
l’autre de la traduire d’vne Langue estrangere en la nostre.
Le succez du premier me contente assez. Mais celuy du second
ne sçauroit te satisfaire si peu qu’il ne me satisface
encore moins. Et si ie n’eusse esté puissamment sollicité de
te donner dequoy te diuertir, te faisant part d’vne piece
qui n’a rien de bon que la nouueauté, i’en fusse demeuré
à la moitié de ma lice, tellement ie me sentois dégousté de
ce bizarre trauail. Si ie n’ay rien touché à deux ou trois endroits,
c’est parce que ce sont especes de quolibets, qui
ne sçauroient passer d’vne Langue en l’autre, sans vn notable
déchet de leur grace, qui n’est autre que celle de leur
idiome : car chaque Langue a les siennes. Au reste, que ta
curiosité me dispense de te faire sçauoir qu’est deuenu l’original,
duquel ie te donne la copie, qui l’a trouué, & comment,
pour des considerations que ie ne te puis dire. Adieu.
Gio. Battista Lucrino [signé] [1649],
LETTRE DECHIFFRÉE D’VN MAZARINISTE A MAZARIN, TROVVÉE ENTRE S. GERMAIN & Paris, & traduite d’Italien en François. , français
Référence RIM : M0_2067. Cote locale : A_5_75.