l’authorité de sa Majesté, la quelle leur donne
tout pouuoir de ce faire par la presente, qu’elle
a signee de sa main, & y a fait apposer le cachet
de ses Armes, voulant quelle serue de
descharge & de commandement, à tous ceux
qui agiront en quelque maniere que ce soit
pour l’execution d’icelle. D’autres ont esté apposees,
tout à fait contraires, qui donnent instruction
aux Parisiens, que pour auoir vne
Paix auantageuse, il faut ruiner l’Armee de Turenne,
& que pour la deffaire il ne faudroit
que prendre Corbeil, ce qui seroit infailliblement,
si les Parisiens sortoient au nombre de
dix mille hommes, & qu’ils demeurassent au
poste où Monsieur le Prince les voudroit placer.

Le mesme iour de Mercredy, Messieurs le
Prince & Duc de Beaufort vindrent du Camp
à Paris, & dissiperent par leur presence le reste
de l’assemblee se litieuse qui vouloit des vnir
Paris & le reduire en cendre par le feu du Papier
& de la paille.

Le Roy est parti de Compiegne Lundy & est
maintenant à Mantes, où les Deputez des six
Corps de Marchands sont allez, esperant d’obtenir
la paix.