puisqu’on n’en veut qu’à luy, qu’on la condamné
comme perturbateur du repos public, qu’on a
vendu & confisqué ses meubles, & que toute vostre
ville de Paris, & mesme tout vostre Royaume,
a conceu vne haine si forte contre luy, que son
sang ne pourroit assouuir le peuple, & son corps
ne pourroit estre assez deschiré pour satisfaire la
veuë de ceux qu’il a si mal traittez.

S’en est on pris au Roy ? bien au contraire, tout
son peuple ne desire que son retour, & celuy de la
Reyne sa Mere. S’en est on pris à vous, vous sçauez
bien cõme ils ont receus à bras ouuerts Monsieur
vostre Frere, & qu’ils vous en feroient de mesme
si vous vouliez y retourner.

Mais il semble que ie parle icy comme bien
sçauant dans vos affaires. Ie ne vous dis rien, Monsieur,
que ce que toute la Terre sçait ; & comme elle
apprehende pour vous vn reuers peut-estre plus
doux que celuy du Roy d’Angleterre. Car sçachant
la bonté des François, elle ne croit pas qu’on
en vienne à cette extremité ; mais elle craint que
quelque mal adroit ou mal-content ne prist si
bien son temps, qu’il ne vous renuersast par terre,
& laissast principalement à la France vn desplaisir
eternel d’auoir perdu vn si grand Chef, vn si grãd
Prince, & vn si grand Capitaine. C’est à vous d’y
songer, puisque vous y auez le plus d’interest. Le
Roy d’Angleterre nous a voulu aigrir, mais il a