peut dire par la mesme raison que tout ce qui est
vray semblable est vray, parce qu’on ne iuge de la
verité que sur les principes que l’apparence en expose
à nos yeux : Mais pour emprunter vn raisonnement
inuincible de l’etimologie du mot, il ne
faut que considerer simplement que Vray-semblance
n’est autre chose que ressemblance ou apparance
de verité : ainsi lors qu’on dit qu’vne chose
est vray semblable on dit qu’elle peut estre veritable,
puis que, pour parler par vn renuersement de
mot elle est semblable au vray.

On accuse le Cardinal de Retz d’auoir allumé
& fomenté toutes les diuisions de l’Estat, car cet
à ce crime que se rapportent tous ceux que son
Autheur pretend renuerser par vne vray-semblance
du contraire : quelque secrette que soit la source,
l’escoulement en est visible ; Et quoy que
l’Autheur de ces desordres ne nous paroisse pas si
manifestement que nous le souhaitterions bien,
pour en faire vn exemple à la posterité ; nous ne
laissons cependant pas d’en ressentir toutes les incommoditez.

La voix publique se declare en partie contre le
Cardinal de Retz : c’est luy qu’elle nomme pour
le boute feu de tous les embrazements publics,
c’est luy qu’elle regarde comme celuy qui est interessé
à fomenter les diuisions de l’Estat : C’est