secours. augmentée par les renfors venus
de Bretagne, d’Anjou, du Berry, de Prouence, de
Bourgongne ; reparee dans toutes ses breches par
les garnisons de toutes les places frontieres qu’on
a degarnies ; conduite par cinq ou six Mareschaux
de Frãce ; animée par la presence du Roy, & payee
auec toutes les finances de l’Estat : C’est extrauaguer
que de parler en ces termes, où cest iuger lachement
auec complaisance pour la creance des
peuples qui s’imaginent tousiours que les affaires
languissent lors qu’elles ne marchent point à l’egal
de leurs impatiences.

Si ce Corinthien estoit bon Capitaine il sçauroit
que les aduantages que M. le Prince a remportez
sur l’armée Mazarine en Guyenne ne meritent
point d’estre traitez de mauuais succez, puis qu’ẽ
vn lieu où toute autre que luy deuoit succomber
en moins de 15. iours, il a puissamment soustenu
pendant six mois toutes les forces de l’Estat que la
faueur de la Reyne faisoit seruir pour le restablissement
du Mazarin.

Mais si cet Autheur Corinthien est mauuais
guerrier il est encor plus mauuais politique, en ce
qu’il pretend, Que le Cardinal Mazarin a recueilly tous
les fruicts qu’on pouuoit tirer des traitez faits auec les
Estrangers ; Si Messieuts les Princes eussent voulu
traiter auec les Estrangers au preiudice de l’Estat,
comme le Conseil du Roy dont le C. Maz. est le
chef ; nous ne penserions plus au Mazarin que
comme à vn Monstre ruiné, qui ne seroit encor
qu’à grand peine en nostre souuenir : Nous le regarderions