dans les suaues ondes qu’il outrepasse. Ses paroles sont agitantes, mais ses intentions
sont toutes saintes. C’est vn diuin médisant pla n de prudence. C’est vn sacré temeraire
remply de force. Bref c’est vn Elie & vn Osée, qui porte les graces du Ciel dans ses
tonnerres. Il a la main d’Esaü & le cœur de Iacob, si à cause qu’il vous blesse Vostre
Majesté & leurs Altesses le jugent à la mort ; parce qu’il vous guerit, & à elles, vous
luy deuez vos indulgences.

Ie voy dessous ses lettres qui tuent, vn esprit qui viuifie.

Oüy, MADAME, j’en puis asseurer Vostre Majesté & leurs Altesses. Il ne vous
auroit pas si fort tendu les decrets de la Iustice diuine, s’il eut eu moins de zele du repos
des Peuples, moins de desir de vos felicités, moins d’amour de Dieu & moins de
courage. Il craint que la cangrenne des troubles ne se tangrege en ne faisant qu’efleurer
le mal, c’est pourquoy il tranche la partie gâtée. Il incite ce qu’il pense, parce
qu’il a le rasoir & le remede. D’autres ont dit plus cruëment, ce qu’il a escrit [illisible] vne
discrete adresse, suiuant les formalités de la Iustice.

Plusieurs fremissent de ce qu’il a parlé si hardiment, & ie m’estonne de le voir si
temperé, quand ie considere que l’esprit qui le ment à fait autrefois des rauages, aussi
bien que perir des villes entieres. On voit bien qu’vn interest n’est pas ce qu’il le pousse.
Il porte plus haut ses pensées. Il a eu la force de vous attaquer, le mesme Dieu qui luy
donne, luy donnera l’humilité pour vous faire honneur, & le desir de vous defendre,
il n’en veut pas au pecheur, mais au vice. Logeant la vertu en la place de son contraire,
au lieu de fulminer dauantage contre les vns & contre les autres, il ne s’étudiera qu’à
vous faire des Panegyriques.

Ie connoy ce Genie qui renuerse toutes les maximes corrompuës, son ambition n’est
qu’vne sainte & adroitte feinte, & vn diuin stratageme, par le moyen duquel, comme
j’ay dit, il pretend tout attaquer, pour se faire de chacun combattre, & diuiser tous les
l’esprits, afin de les faire mieux joindre.

Ie le supplie, & à Vostre Majesté, de receuoir cette douce interpretation sur les piquants
ouurages qu’il vous adresse, afin de les prendre du sens suiuant lequel, comme
ie croy, Dieu vous les enuoye.

Faites la paix & en distribués les fruits à ce particulier, qui s’abandonne à la mercy de
Vostre Majesté & de leurs Altesses, en vous outrageant, pour vous obliger à la conclure.
Mesurés le par bonté, comme vous desirés que Dieu vous mesure en Iustice.

Il y a diuers membres en vn corps, le S. Esprit depart aussi plusieurs dons aux justes.
Si j’éclos suffisament l’intention de l’Autheur de la piece intitulée, La Sapience Celeste
estimée folie des sages du monde, & qu’en suiuant cét aduis quelque bien nous en arriue,
ie l’attribuë à celuy duquel tout don parfait procede ; mais si ie ne touche pas le but, ie
ne pretends pas éluder la parole diuine deuant laquelle ie m’humilie, & laquelle ie tache
de temperer à Vostre Majesté & à leurs Altesses pour vous faire regarder celuy qui en
est le porteur auec sa mesme complaisance qu’il vous l’étalle, quoy que d’ailleurs ses paisibles
flames semblent des foudres. Si elle n’est pas diffinitiue, ce que ie vous en dis est
ferme ; mais si Dieu la decidée en dernier ressort, le jugement que ie fais de son intention
est cominatoire.

Cette Sapience a quelque ie ne sçay quoy qui m’arreste, & que ie ne [1 mot ill.] pas encore.
Si Dieu me l’ouure plus à plain, j’accomoderay, suiuant ma petite portée, la folie à la
sagesse, ou pour mieux dire la force diuine à la foiblesse humaine.

Ce n’est pas d’aujourd’huy que le Maistre de l’Vniuers, fait paroistre ses sages en sa