yeux que l’on vous foule aux pieds. Ce ne sont plus les
Normans qui ayent pris terre en France par nos riviéres,
ce n’est point le Payen Attila ; car il portoit respect aux
Evesques & aux Pasteurs, il croyoit vn Dieu, puis qu’il
se disoit luy-mesme estre son fleau : ce sont des François,
des Alemans, des Italiens & des Polonnois ; c’est à dire,
des Scythes & des Gelons.

Il y a peu de François, il est vray, qui soient accusez
de ces impietez, il est vray que c’est pour vn Italien qu’elles
se commettent, & pour vn Cardinal, & que la Reyne
qui le soustient contre la iuste indignation des peuples
n’est point Françoise non plus. Mais ce sont des Princes
qui les ont introduits dans le centre de l’Estat : Et c’est
vn Comte François qui les commande en Brie, qui approuve
toutes les abominations, & qui partage tous les
larcins : c’est le Comte de…. Monseigneur, c’est
ce Vulcan mal-heureux, & ce miserable boiteux qui a
l’ame encor moins droite que le corps, & que Dieu atteindra
le premier aussi-tost que sa iustice sera satisfaite
de nostre persecution. Il a volé Lezigny & Panfou, il
a couppé iusques à des Tableaux dans leur enchasseure
pour les emporter, & n’a pas emporté les Chasteaux &
les maisons, que parce qu’ils estoient attachez à la terre,
mais il les a desolez.

C’est vn homme dont les crimes ont fait connoistre
son nom, & qui n’a fait que des ennemis dans son propre
pays, où la bassesse de son extraction le rend méprisable
par les Noblés, & où le peuple deteste sa violence, & son
humeur tyrannique. Nous avons vn de nos Peres qui
connoist sa Race, & qui nous a asseuré que le nom qu’il
porte luy est commun, comme le sang & le cœur avec la