sujets à corruption par les influences exterieures, aussi
cette vertu qui est d’vn temperament fort delié,
peut estre facilement alterée par le mauuais ménage
qu’on en fait. Outre que les hommes quelques fois
par presomption, quelquefois pour faire voir leurs
belles conceptions & leurs inuentions, ou mesme
s’addonner plus librement à leurs plaisirs l’abandonnent
honteusement & font des veaux d’or en bethel
au lieu des Cherubins de Hierusalem : c’est pourquoy
les anciens Philosophes ont crû estre à propos de
pouruoir au malheur qui en pourroit arriuer, & moy
ie me persuade que vostre Majesté aggreant mes offres,
aura égard à ce petit trauail que i’entreprens
pour fortifier sa ieunesse dans les resolutions qu’elle a
prise de suiure par tout les pistes de la vertu par le
moyen de la pieté qu’elle a vouée à son souuerain.
L’exemple peut beaucoup & l’experience est vne
maistresse infallible, ie ne me seruiray pour le present
que de celle que nous a laissé cét incomparable
Roy de France S. Louys.

Aussi i’estime qu’entre tous ceux qui ont iamais
rendus leurs Estats Celebres par la pieté, on n’en
trouuera point vn plus sincere ny vn plus admirable
que S. Louys, la vie duquel semble bien estre la plus
saincte, parce que ça esté la plus dés-interessée, veu
qu’il n’auoit autre pensée pour rendre son Royaume
florissant & auoir vn regne heureux, que d’attacher
sa personne & ses peuples aux interests de Dieu, faire
que la terre ne fut plus qu’vn Temple de la Diuinité.