vn plaisir extreme, ne souhaittant rien
au monde auec tant de passion, que de
voir ses ennemis abbatus à ses pieds, &
conuaincus de la grandeur de son courage
par les effets de sa clemence. Il faut pour
vne bonne fois regler l’authorité & la jurisdiction
de ces gens de chicane, pour
commencer vn nouueau Regne, dont la
gloire & la ioye ne soient iamais interrompues.
Ie consens de mourir, & mourray
satisfait, quand j’auray veu son Eminence
couronnée de la main de ses persecuteurs.
Ie sçay de bonne part, qu’entre
les Generaux deux des plus fideles en apparence,
demeureront les plus doux, & se
rendront à la premiere atteinte qui viendra
de la Cour.

Les nouuelles de Normandie se debitent
icy auec beaucoup de contrarieté.
Hier sur les dix heures du matin, le Duc
de Luynes, pour tenter viuement la fermeté
de Monsieur le Duc de Chevreuse,
luy porta la copie d’vne depesche pretenduë,
par laquelle Monsieur le Duc de Longueuille