pouuoir les priser pour arrester nos considerations sur
vne autre Table, dont la beauté fait mespriser celle qui
fait l’ornement de la Sale precedente. Lors que nous la
considerons, il nous semble voir vn beau Parterre semé
de Fleurs. Il faut aduoüer que l’Art est vn admirable
Iardinier, puis qu’il seme le Marbre de Fleurs d’autant
de diuerses couleurs, qu’vn Iardin bien cultiué en peut
fournir. La diuersité des couleurs du Marbre artificiellement
taillé, fait la diuersité des Fleurs. Vne main ingenieuse
a contraint la dureté du Marbre de fleurir, &
la fermeté mesme de prendre la forme de la fragilité.
Les pieces de ce Marbre formées par le trauail en
Fleurs, ont vn rapport admirable auec le fond de la
Table, qui est de mesme matiere & de couleur noire,
pour nous faire paroistre par ce doux mélange & combat
de contraires couleurs, qu’il faut chercher nostre
plaisir dans la meslée, & que nos Felicitez sortent des
combats.

Table de
Marbre
taillée en
Fleurs bien
rapportées
au corps.

Cette Sale nous donne l’entrée d’vne autre où l’Antiquité
semble auoir apporté toutes ses Merueilles. Icy
les plus fameux Sculpteurs reconnoissent leur ignorance,
le nombre des Statuës leur donne de l’estonnement,
& la Sculpture les fait desesperer, de pouuoir iamais
porter leur artifice iusques à sa perfection.

Sale des
Antiques
où il y a
vne Statuë
seule, qu’on
dit coustez
deux mil
escus.

Les François auoient mesprisé tousiours ces Idoles,
mais ce pompeux Cardinal les a rendu cheres, en leur
faisant bailler de l’or, pour auoir des pierres taillées.

Ie ne m’estonne point de ce qu’il ayme ces figures
de marbre ; tous les Italiens regardent ces formes insensibles
comme leurs viues images. Pour leur témoigner
nostre amour nous desirons, que puis qu’ils ont
tant de passion pour du marbre figuré, ils soient changez
heureusement en la chose aymée.

La rareté de ces ouurages rencontre des admirateurs,
mais elle n’en trouue point tant, qu’vne riche & royale
Table, qui estalle au milieu de cette Sale les richesses
de l’Orient. Royale à la verité, puis qu’elle a seruy au