à terre ; & si auec tout cela il pretendroit encore se voir en estat
de donner de la lumiere au Soleil, & des eaux à toutes les mers
du monde.

Messieurs du Parlement sont bien esloignez de tomber en de
pareilles fautes. Ces grands hommes ne marchent pas dans les
ruës, & ne s’occupent pas à la contemplation de ces flambeaux
Celestes, lors qu’ils donnent des Arrests sur des matieres si importantes.
Leur personne est assise dans vn lieu où la plus hardie
des femmes n’oseroit faire vne pareille action à celle de la Milesienne,
quand mesmes ils ne feroient que se promener dans la
chambre, & où ils ont tousiours l’esprit porté sur le suiet pour
lequel ils sont assemblez, & sur lequel ils doiuent resoudre. Et
quand par malheur il y en auroit quelqu’vn qui se trouueroit
auoir l’esprit diuerty par d’autres pensées, le grand nombre de
ses Confreres qui sont dans vne si celebre Assemblée, le feroit
reuenir à soy, & l’empescheroit de choir dans vne semblable
disgrace.

C’est en vain, dit-il, qu’on coupe les branches de ces mauuaises
plantes qui s’attachent aux bonnes, si l’on n’en arrache la
racine. Le premier Printemps leur redonne la naissance, & les
fait bien souuent repousser auec plus d’estenduë. Il vous en
peut arriuer de mesme, dans la conioncture des affaires presentes ;
car si vous ne déracinez les desordres qui s’attachent maintenant
au Ministere, vous y pourriez bien en effect apporter
quelque amandement : mais le principe y demeurant, ce sera
tousiours a recommencer, & vous vous exposerez au hazard de
les reuoir dans peu de temps regner, & peut-estre auec beaucoup
de violence.

Sçauroit-on trouuer vn simple garçon de Iardinier qui ne soit
aussi bien congru que luy en des pensées si sublimes. Il vous
donne aduis Messieurs, d’vne chose que le plus ignorant de tous
les hommes peut sçauoir, & que les animaux qui paissent l’herbe
tous les iours sçauent aussi bien que cét illustre Politique. La
comparaison de ces plantes n’est pas moins ridicule que l’exemple
qu’il vient de rapporter du Philosophe Thales ; veu que les
plantes ne repoussent leurs branches, apres qu’on les leur a
coupées, que par vn principe vegetatif, interieur, & naturel de
mouuement, qui sont des operations fixes, stables, & limitées