soient comme celuy de Salomon : C’est à dire, dans vne
pureté tres-grande, laquelle nous est signifiée par l’esprit
Diuin, qui est la source de toutes les puretez sainctes &
Diuines. En effet, dit Pascasius, la chair, & le sang de Iesus-Christ
estans consacrez par le S. Esprit ne nous peuuent
profiter sans l’huille & l’onction du mesme esprit. Neque
caro aut sanguis sine oleo spiritus sancti prodest nobis, imò magis
officit, ideò quisquis recte vult communicare sic viuat necesse
est vt templum spiritus sancti esse queat. Ouy il est necessaire
que celuy qui veut dignement Communier, viue en sorte
qu’il soit tousiours le Temple du S. Esprit qui rend tesmoignage
dedans nos cœurs que nous sommes les enfans de
Dieu, & qu’il est nostre Pere : Misit spiritum filij in corda
nostra clamantem abba Pater. Iesus-Christ voulant monstrer
à ses Apostres, que par la Communion, il se fait nostre
Pere, & nous rend ses enfans, il demande à son Pere Eternel,
que nous soyons en luy comme il est dans son sein &
dans son essence. Aussi apres ce Diuin banquet, l’heureux
Disciple S. Iean, comme remarque S. Chrysostome, reside
dans le sein du Sauueur comme en celuy de son pere, &
y deuient son enfant d’vne maniere ineffable, & que les
mortels ne peuuent exprimer. Qui est in sinu Patris non
diuer sam substantiam in sinu haberet pater. Mais cependant
que le S. Esprit, dit le mesme S. Chrysostome, publie dans
le ventre de S. Iean, & de ceux qui communient dignement
qu’ils sont les enfans de Dieu ; Il crie en celuy de
Iudas, & des indignes communians qu’ils sont des parricides
mal-heureux, & des infames qui donnent la mort à
l’Autheur mesme de leur vie : & pourquoy pensez-vous
que le Demon entre dans le cœur de Iudas apres qu’il eut
prit cette Diuine viande : ce n’estoit pas, dit S. Anastase,
pour mespriser ce Sacrement qu’il adoroit, mais pour y
dire à ce traistre auec le Diuin esprit qu’il estoit vn parricide,
vn meurtrier, vn homme de sang & de carnage Non
quod Diabolus panem illum despiceret sed vt eum qui sumpsevat
redargueret in iudicium. Dieu veut que celuy qui tuë vn
homme par dessein ou par des embuches qu’il luy aura

Page précédent(e)

Page suivant(e)