suppression parmy ceux qui se dressoient à la Chambre
de Sainct Louis, & mesme fit faire cette proposition aux
Chambres assemblées ; mais elle fut trouuée si peu raisonnable,
& ces Factums si peu respectueux enuers la
memoire du defunt Roy, que l’on n’y eut point d’égard.
Du depuis vos Majestez estans sorties de Paris, ils embrasserent
ardemment cette occasion de poursuiure leur
dessein, & se declarerent les premiers contre vos intentions.
La contagion auoit rendu la ville de Roüen presque
deserte, les Anciens l’auoient abandonnée, & s’en
estoient fuys dans leurs Maisons des champs. Ce danger
extréme ne nous auoit pû donner de frayeur au prejudice
de nostre deuoir, nous y estions demeurez pour rendre
la Iustice, & donner les ordres au peril de nos vies. Comme
le bruit des troubles de Paris arriua, leur ambition
plus forte que la crainte de la mort, les ramena tous en
grand’haste à Roüen, où ils apporterent vne peste bien
plus pernicieuse que l’autre, qui est la faction dont ils
enuenimerent les esprits.

ILS ne sont pas plûtost arriuez dans la Ville, que sans
s’arrester ny aux ordres precis de Vostre Majesté, ny à l’vsage
receu, ny à vn Arrest qui leur defendoit de s’assembler,
ils viennent tous au Palais tumultuairement, confondent
les deux Semestres, & s’estans par leur plus grand
nombre rendus Maistres des deliberations, & de la Ville,
ils firent des choses qu’il est aussi impossible d’excuser,
que necessaire de les oublier. Ce fut lors que ne pouuans
nous souffrir pour témoins de ces violents procedez,
non plus que nous ne pouuions endurer d’en estre
les complices, ils donnerent Arrest par lequel ils declarerent
nos receptions nulles, nous firent defenses d’exercer
nos Charges, & à tous vos Subjets de nous reconnoistre.