ses exemples domestiques deuoit luy faire esperer vn repos
& vne tranquilité parfaite, la trouble luy-mesme & la
dissipe, qu’au lieu d’enseigner l’obeyssance aux sujets de
vostre Maiesté par son exemple & ses deportemens, il l’exige
luy mesme, & s’atribuë toute l’authorité Royalle qu’il
deuoit respecter le premier ; Au lieu d’estre le Pere commun
de tous, il en choisit vn petit nombre qu’il recompense
de leur propre bien, qu’il contient par des menaces, ou des
vaines esperances, qu’il intimide par les respects de ses illustres
alliances, & par le mauuais vsage qu’il fait de son pouuoir
traite les autres comme des estrangers & des rebelles,
les repoussant & les poursuiuant par tout, s’attachant à leur
perte sans pitié & sans retenuë, & faisant passer sa haine
pour vn crime de leze-Maiesté : au lieu d’establir l’vnion
dans la Prouince, la deschire par des diuisions intestines, inspire
à tous le mespris de leurs Magistrats, les soustrait de
l’obeyssance des Loix, leur promet par des evocations l’impunité
de leurs crimes, & s’arme contre la Iustice lors qu’elle
en veut faire la punition.

Vostre Parlement (SIRE) qui a desja seruy tant de Roys
auec honneur, qui a tousiours entretenu cette Prouince tant
recherchée par ses voisins, dans la fidelité qu’elle vous doit,
& qui l’auoit iusques à present conseruée dans l’vnion & la
liaison qui doit estre entre ses concitoyens, seroit preuaricateur
si par crainte, ou par complaisance il laissoit dissiper
vostre Patrimoine, & brescher vostre Couronne en vn si
beau fleuron, sans exposer son deuoir aux yeux de toute la
France, & demander à vostre Majesté vn Iugement public
qui fasse cognoistre à ses peuples quelle est la main qui les
frappe.

Vos Officiers disent hautement que vostre regne est innocent.
Que la Reyne Regente vostre Mere leur à souuent
tesmoigné qu’elle desiroit que cette Prouince fust en
paix & en repos, & qu’elle auoit eu pitié de ses maux. Vos
Declarations du mois de Mars dernier sont les garants de
leurs paroles, & les gages de la foy publique : & toutesfois