la misericorde qu’il luy demande auec tant de passion. Ce
Patriarche renonce non pas à des grandeurs humaines, mais à
son propre salut, afin d’obtenir la grace du pardon à vn peuple,
qui n’auroit que de l’ingratitude & de la mécognoissance pour
tant de biens-faits. Saint Paul consent à estre separé de Dieu
& priué pour vn temps de sa gloire, s’il iugeoit que cette priuation
peust donner plus de lieu à la conuersion de ses freres
les Israëlites : Et le Fils de Dieu s’est fait sur l’Autel de la Croix
vne Hostie d’expiation & d’Anatheme pour le salut des pecheurs ;
il a souffert des playes & des miseres sans nombre pour
obliger des ingrats & captiuer des rebelles, il a respandu son
sang, espuisé ses forces & sa vie, il a immolé son honneur &
sa gloire sur la Croix, afin de faire grace à des coulpables, & associer
ses ennemis mesme au throsne de ses grandeurs ; Et iamais
il n’a paru plus obligeant que lors qu’il s’est senty plus
affligé ; & le gage le plus considerable qu’il nous a laissé de son
Amour, a esté le fruict du supplice qui luy a osté la vie.

POVVEZ-vous refuser, MADAME, de vous rendre
à la force de cet exemple de bonté & de misericorde, comme
Chrestienne vous le deuez imiter, ou vous ne deuez iamais esperer
de salut ; & en qualité de Reyne vous ne vous pouuez
excuser de fleschir sous le poids de ces raisons, voyant le plus
innocent des hommes & le premier de tous les Roys, auquel
vous estes redeuable de vostre Couronne, souffrir & perdre
& l’honneur & la vie pour les pecheurs ses ennemis : il vous a
donné part à ses misericordes, lors qu’il vous a fait naistre dans
son Eglise, ayant de plus annobly vostre Maiesté des manques
de sa grandeur, & tracé sur vostre persõne l’image de sa souueraineté :
Et auiourd’huy il se promet que vous serez vne image
de sa Clemence ; & qu’en consideration de sa Bonté infinie, qui
ayant esté si sensiblement offensée, n’a eu que des graces &