[1 ligne ill.]
auoir vescu dans vne santé languissante, seruy assez heureusement dans des
temps difficiles, & des affaires tres-espineuses, & experimenté la bonne & mauuaise
fortune en diuerses occasions, en rendent au Roy ce à quoy sa bonté & ma
naissance m’ont obligé particulierement ; Ie n’ay iamais manqué à ce que i’ay deu
à la Reyne sa Mere, quelques calõnies que l’õ m’ait voulu imposer sur ce suiet.

I’ay voulu pour plus grande seureté de ce mien Testament, declarer que ie
reuoque tout autre que ie pourrois auoir fait cy-deuant, & ne vouloir aussi en
cas qu’il s’en trouue cy apres quelqu’autre de datte posterieure, qui reuoque
celuy cy, que l’õ n’y ait aucun égard, s’il n’est tout escrit de ma min, & reconu de
Notaires, & que les mots suiuans, satiabor cum apparuerit gloria tua ; ne soient inserez
à la fin, & immediatement auant mon seing.

Et dautant qu’a cause de madite maladie & des abscez suruenus sur mon bras
droict, ie ne puis écrire ny signer ; i’ay fait écrire & signer mon present Testamẽt
contenant seize fueillets & la presente page, par ledit Pierre Falconis Notaire
Royal, apres m’en estre fait faire lecture distinctement & intelligiblement. Faict
audit Hostel de la Viconté le vingt-troisiesme iour du mois de May l’an 1642.
auant midy. Signé, FALCONIS.

L’An mil six ceus quarante deux, & le vingt-troisiesme iour de May apres midy, dãs
l’Hoctel de la Vicõté de Narbõne, Regnãt le tres Chrestien Prince Louys XIII. Roy
de France & de Nauarre deuant moy Nottaire. Fut Present en sa Personne Monseig.
Armand Iean du Plessis Cardinal de la saincte Eglise Romaine, Duc de Richelieu & de
Fronsac, Pair de France, Commandeur de l’Ordré du S. Esprit, grand M. Chef &
Sur-intendãt general de la Nauigation & cõmerce de se Royaume, Gouuerneur & Lieutenant
general pour sa Majesté en Bretagne, lequel detenu de maladie, & sain d’entẽdeinent,
a dit & declaré auoir fait escrire dans les seize fucillets & demy de papier escris,
fermez & cacheptez du Cachet de ses Armes auec cire d’Espagne, par moy Notaire son
Testament & acte de derniere volonté, lequel moy dit Nottaire ay signé, mondit Seigneur
le Cardinal n’ayant peu écrire, ny signer sondit Testament de sa main à cause de sa maladie,
& des abscez suruenus sur son bras droict : Tout le contenu : auquel Testament son
Eminence veut valoir par droict de Testamẽt, clos & solennel, Codicille, Donatiõ, cause
de mort ; & par toute telle autre forme que de droict pourra mieux valoir nonobstant
toutes obseruatiõs de droict escrit, ausquelles le lieu où se trouue presentemẽt son Eminence
pourroit l’astreindre, & toutes autres Loix & Coustumes à ce contraires, & a pris les
tesmoins bas nommez d’attester sondit present testament. & moy Notaire luy en dõner
le present acte, concedé en presence de Monseig. l’Eminentissime Cardinal Mazarini,
Messieurs l’Escot nõmé par sa Majesté à l’Euesché de chartres, Daumõt Abbé d’Vzerches,
de Perefixe Maistre de Chambre de mondit Seigneur Cardinal Duc, de la Barde
Secretaire du Cabinet du Roy, & Thresorier de France à Paris, le Roy Secretaire de sa
Maiesté, Maison & Couronne de Frãce, & de Romefort Abbé de la Clairté-Dieu soussignez.
& moy dit Notaire auec iceux tesmoins, mondit Seigneur le Cardinal Duc n’ayant,
pû signer le present acte à cause de sadite maladie. Signé, Le Card. Mazarins

l. l’Escot. R. Daumont. I. de la Barde. Denis de Remefort.

Le Roy. Hardouin Perefixe. Falconis.