L’enuie le prit le Dimanche dernier de faire vne
Farce pour se diuertir, cependant que l’on tenoit
la Conference à Ruel touchant les affaires les plus
importantes pour le salut de la France ; il s’habilla
en vendeur de Baulme, & pria ses Niepces de faire
les personnages des Danseuses de corde : Et les
Partisans de contrefaire les Arracheurs de dents,
ils se mirent tous dans la disposition de bien faire
leur deuoir ; & pour mettre en execution leur dessein,
ils firent dresser vn Theatre dans la place de
sainct Germain en Laye, où estans montez, voicy
que le Mazarin, commença à faire sa premiere entrée,
& fit vne grande reuerence à l’Italienne à tout
le peuple qui y assistoit ; & en apres il commença
à faire vne excellente description des vertus &
proprietez de son remede : Ne croyez pas qu’il
fust composé d’Anis, de Reubarbe ou de Sené, ny
de quelques rares & salutaires simples, ny moins,
encore qu’il fust semblable au remede que distribuë
son grand amy Oruietan, il aymeroit mieux
plustost en distribuer vn qui luy fust contraire
entierement, & ne seroit pas plus soigneux d’en
distribuer à nos Messieurs du Parlement, qu’à plusieurs
Princes de la France, afin de les faire aller
plus viste en l’autre monde, son remede est d’vne
autre nature, & la composition en est prodigieuse ;