Anonyme [1649], SEANCE DV ROY LOVYS XIV EN SON LICT DE IVSTICE, EN PARLEMENT ou les vrayes Harangues de Messieurs le Chancelier premier President, & Talon Aduocat General. , françaisRéférence RIM : M0_3600. Cote locale : C_10_2.
-- 7 --
HARANGVE DE MONSIEVR
TALON ADVOCAT GENERAL.
SIRE,
La seance de vostre Maiesté en ce Parlement, qui preuient nos
soins & nos deliberations, & qui semble par ce moyen rendre nos
Exercices su perflus & nos fonctions Inutiles, doit auoir pour fondement
cette pensée, des Astronomes, que les astres, ou constellations,
quand elles sont seules, operent biens plus puissamment, que
quand elles sont auec d’autres, dont la conionction diminue les forces
de leurs influences ; Ains ils disent que si la planete de Iupiter
pouuoit dominer toute seule sur la terre les hõmes seroiẽt immortels
Ainsi que vostre Maiesté sera plus puissante, si elle agit toute seule.
Mais il n’en est pas du gouuernement de la terre comme de celuy
du Ciel. Dieu seul est celuy, qui ouure & qui ferme selon la parole
de l’Escriture. C’est luy seul qui dispose par sa prouidence au gouuernement
de tout le monde sans que pour cela il ayt besoin ny
d’aydes, ny de conseil. Mais pour les Roys, encore qu’il soient de la
race des Dieux, ils sont neantmoins égaux aux Enfans des hommes.
En ce qui est des principes de la nature, ils sont composez de mesme
matiere, & ont vne raison, qui n’agit que par les mesmes ressors &
& vne authorité, qui à besoin & d’ayde & de conseil, aussi n’est
ce pas l’authorité toute seule qui fait les monarques ; c’est la subiection
des peuples. Ce ne sont pas les grands qui font les Royaumes,
puis qu’ils n’en font guere qu’vne petite partie ; mais la multitude
des habitans ; & il faut pour faire subsister vne Couronne beaucoup
de secours estrangers : elle depend de la vigilance des Officiers, de
la patience des soldats, de la submission des peuples : & si elle en
estoit destituée, la monarchie ne seroit plus qu’vne Idée. Ainsi,
Sire, ce qui fait vostre monarchie, & qui la fait subsister, c’est que
vostre naissance nous engage sous vostre obeissance, que nous sommes
nés françois & que Dieu nous à mis dans la conscience, les
principes de nostre deuoir & du respect que nous sommes obligez de
vous rendre, & qui nous persuades que les Roys estant éclairez d’vne
lumiere superieure & diuine qui leur est communiquée d’en
hault ; il faut obeir à leurs ordres auec soumission & veneration.
C’est ce qui fait, Sire, que nous vous supplions de considerer, que
dans la nature toutes choses ne subsistent que par vne espcce de contradiction
& de contrarieté ; que les Elemens se conseruent en
agissant l’vn contre l’autre ; que les qualitez contraires qui composent
les astres, se font vne guerre continuelle & ne subsistent que
par elle ; & que si quelqu vne deuenoit trop puissante, elle destruiroit
Anonyme [1649], SEANCE DV ROY LOVYS XIV EN SON LICT DE IVSTICE, EN PARLEMENT ou les vrayes Harangues de Messieurs le Chancelier premier President, & Talon Aduocat General. , français Référence RIM : M0_3600. Cote locale : C_10_2.
|