d’outre mer pour ses vsures, viennent au Roy
sans faire bruit, le suplier qu’il luy plaise desormais
de traiter les affaires de son Royaume qui
auoient grand besoin d’estre reglées, par le
conseil de ses Barons, afin d’obuier aux dangers
eminens qui menaçoient son Estat. Vaincu
par leur importunité il leur promit de garder,
& maintenir tout ce qu’ils ordonneroiẽt. Assẽblée
tenuë il fut ordonné, que le Roy chasseroit
de son pays, selon le commandement du
feu Roy son Pere, tous estrangers, & ceux qui
luy donnoient des conseils pernicieux au bien
de sa Couronne. Tellement que Pierre de Gauerston
fut condamné de vuider l’Angleterre,
& d’estre relegué en Hibernie. Le Parlement
finy chacun s’en retourne content, le Roy seul
en receut vn tres grand desplaisir. Ce Prince
quelque temps apres le rapella, & luy fit espouser
vne fille de grande condition. Son orgueil
s’augmentant de iour en iour, les Seigneurs leuerent
vne puissante armée, non pas contre
leur Prince, mais seulement pour se rendre
Maistres de Gauerston, & en faire iustice. Il
fut assiegé dans le Chasteau de Scardebourg,
& fut contraint de se mettre entre les mains
des Barons. Gerston eut la teste tranchée
comme vn violateur des loix, & comme vn

Page précédent(e)

Page suivant(e)