de Graueline, Dunquerque & Furnes, si esloignées
de tout autre establissement, ne luy eust pas fait perdre
son premier dessein s’il l’eust conceu auec quelque sorte
de resolution de le faire reüssir. Ces differentes demandes
font assez connoistre qu’il n’auoit pas pris aucun
dessein de Souueraineté, qu’il ne cherchoit ses
establissemens que par des voyes iustes & legitimes, &
qu’il souffroit vn refus auec patiẽce, puis qu’on aduouë
qu’il a changé de demande, pour s’accommoder plus
aysément à la volonté de sa Majesté & aux raisons d’Estat,
qu’elle auoit la bonté de luy faire connoistre ; Ce
n’a iamais esté vn crime d’auoir des pretentions, d’employet
pour les faire reüssir des moyens iustes, authorisez
par l’vsage des prieres, des respects & des soumissions,
comme l’on voit qu’il a tousiours fait ; Mais c’est
vne impertinence, vne faute inexcusable au Cardinal
Mazarin, d’auoir conseillé qu’on lezast vn Prince dont
la fidelité luy estoit suspecte.

Mais pour respondre plus particulierement à toutes
ces accusations. Il est estrange qu’on luy fasse vn crime
des conseils innocens qu’il a donné de conquerir la
Franche-Comté, sans autre dessein ny interest, que
d’agrandir le Royaume d’vne Prouince considerable,
& dont la situation est si auantageuse pour la conseruation
des places que nous tenons sur le Rhin, qui sans
cela demeurent exposées aux forces d’vne puissante nation,
& presque sans esperance de secours, particulierement
si pour le bien de la paix nous rendions la Lorraine
au Duc Charles. Monsieur le Prince n’en a iamais
demandé la Souueraineté, cette demande eust
esté criminelle, bien est-il vray que le Cardinal Mazarin
ayant intention de diminuer le credit & la reputation
qu’il s’estoit aquise dans le commandement des
armées, luy proposa l’entreprise du Royaume de Naples,