Roy, & commençant par ces mots, Sa Majesté, &c.
Elle doit plustost estre appellée ordonnance, estant
semblable à celle qu’on a de coustume d’afficher à
la suite de Sa Majesté pour la police de la Cour, ou
pour la marche des troupes, ou Sauue-gardes, qui se
mettent au dessus des portes, signées d’vn Secretaire
d’Estat, & ainsi, quoy que l’intention du Roy
soit tres-innocente, ne souhaittant autre chose que
de donner la paix à ses peuples. Nous voyons par là
que sa bonté a esté surprise par son mauuais Conseil.

Dailleurs, puis qu’il plaist à Sa Majesté tesmoigner
sa bienueillance enuers ses peuples, & qu’elle
veut rendre le repos à ses sujets, que quelques perturbateurs
luy auoient osté, il est absolument necessaire
qu’elle donne vne Amnistie genérale en
bonne forme & sans reseruation, ou plustost vn
Edict general de pacification, ainsi qu’il s’est pratiqué
sous ses predecesseurs Roys, & entr’autres sous
le feu Roy Henry le Grand, d’heureuse memoire,
lors des troubles de la Ligue, & de ceux de la Religion
Pretenduë Reformée, & mesme du temps du
feu Roy Louys XIII. que Dieu absolue, lors des
troubles de feu Monsieur le Prince pour le Mariage
de Sa Majesté, & autres mouuemens qui sont
suruenus depuis, & que l’Edict soit ample & clairement
exprimé, & non en formes obscures &
equiuoques, & comprenne toutes sortes de personnes
indifferemment, de quelques qualitez ou