& Pompée, parce que la Loy le deffendoit, deuinrent
esclaues des Romains, virent piller leurs Autels
& profaner tous leurs Temples : où de Iesu Naué
& des Machabées, qui le iour du Sabath triompherent
de leurs ennemis. Au contraire, dit le grand
Tertullian, les premiers abandonnerent la Foy, & les
derniers combattirent pour la Loy, ils maintinrent
le Sabath, la Religion & les Sacrifices.

Il faut donc conclurre que quand il s’agist de vanger
l’injure publique, les formalitez ne sont plus de
saison ; c’est l’esprit de la Loy, c’est ainsi qu’elle l’explique.
Si la baguette du Iuge est trop foible pour
soustenir son authorité, si les armes ordinaires sont
méprisées, il doit pour lors abandonner les formes
judiciaires, & opposer la force à la force.

Mais ie demanderay encores à ce nouueau pretendu
Parlement de Ponthoise (qui veut donner la Loy
au parlement de paris) esclaues du tyran Mazarin, &
de vos propres crimes, qui trahissez l’honneur du Roy
vostre Maistre, & la gloire de vostre Patrie, qui voulez
la faire le joüet de la fortune pour satisfaire à vostre
ambition, vous ne trouuerrez point d’exemples
de cette perfidie. Parcourez toute nostre Histoire :
Voyez celles de nos voisins & des nations les plus portées
à la seruitude, vous ne trouuerrez point d’infamie
semblable à la vostre.

Vous attaquez vn parlement, qui n’est que trop
formaliste pour vous, qui a tousiours maintenu
l’honneur des Rois & de la Couronne, vous conseillez