Mais c’est en ce temps, Madame, (pour venir au
suiet de ma lettre, que ie tire de mon malheur) où V.
M. s’est trouuée offencée d’vn afrõt imaginaire (pardonnez
à ma douleur qui perd le respect en cette
rencontre) & où elle a voulu se venger contre des innocens
& prendre le party des ennemis de sa Couronne
& de son Estat. Ouy, Madame, les Parisiens sont
des innocens, & ie puis respondre de leur innocence,
comme de leur patience & de leur force, ayant veu
tous leurs comportemens ; mais celuy que V. M. protege
auec tant de tendresse, indigne de vos faueurs, &
comme vous auez tousiours esté tres-bonne, vous
deuiez relascher vn peu de cette bonté pour l’esloigner
de vostre Cour : & satisfaire tout le peuple, qui
s’estant veu à la fin reduit aux abois par son auarice,
a enfin murmuré, mais auec toute la douceur possible,
contre son insolence.

I’ay dit, Madame, qu’il estoit ennemy de vostre
Couronne & de l’Estat, & vous le pouuez voir aisement
par vos coffres & ceux du Roy, qu’il a epuisés,
par les cris & les plaintes de vostre peuple, & par le
pou de fruict que la France a eu de son ministeriat :
Vous le sçauez mieux que moy, & quand il sera esloigné
entierement de vostre Personne, vostre conscience
qui a tousiours esté si iuste & si peu soüillée,
vous desabusera, & fera voir à Vostre Majesté la
verité de mes parolles, qui sont appuyées des sentiments
de toute la terre, qui vous supplie auec