Roy, ce grand sens, ce iugement & conduite requise
pour le gouuernement de son Royaume, que le temps seul
luy peut produire, si est-ce que vous ne deuez attendre l’aage
de maiorité à le faire oindre, sacrer, & couronner : il
est nostre Roy, vieux ou ieune, il luy faut tousiours appliquer
ces saincts Caracteres : où doiuent assister tous les
Princes du Sang, autres Princes, & Officiers de la Couronne.
Apres cela, faites luy faire vne visite generale par
tout son Royaume, afin que chacun de ses sujets le recognoisse
& luy preste le serment de fidelité. La prensence du
Prince de quelqu’aage qu’il soit, est de si grand merite, &
recommandation enuers ses suiets, qu’elle esmuent à merueille
leurs esprits à luy vouloir vne bien-veillance. Et
neantmoins, MADAME, il est necessaire en cecy de faire
la guerre à l’œil, & en vser ainsi que trouuerez les affaires
disposées, sans vous eslongner aisement de la ville premiere
& capitale de France, que vous voyez par ses pleurs estre
du tout voüée au seruice de son Prince.

Assemblée d’Estats.

Vovs ne deuez assembler les Estats, non pas pour la
raison que l’on faict sonner à vos oreilles, qu’ils apporteroient
quelque retranchement à vostre grandeur. C’est
tout le contraire, les Estats y ayant passé en corps, & en authorité
publique, luy donneroient vn plain pied. Mais
le suiect pourquoy vous deuez eslongner de faire cette assemblée,
ie le vous diray. Ce seroit vn outil à ceux qui
voudroient remuer l’Estat pour donner vne forme à leurs
brigues, chacun endroict soy gangneroit vns & autres des
deputez par courtoisies, presens, bien-faicts, belles promesses
& autres faueurs, & tous ces particuliers retournez
en leurs Prouinces seruiroient de flambeaux pour allumer
des nouueaux feux, & remuemens. Ie sçay bien qu’il n’y a
Prince ou grand Seigneur qui ait ce proiet en sa teste, estant
tous d’vne mesme deuotion, vouez à la fidelité du Roy :