iuger, s’ils iugent autrement que l’equité : I’ay dit
que vous estes des Dieux & les fils du Tres-haut : Sont-ils
legitimes s’ils n’apprennent les loix & les coustumes
pour iuger ? & s’ils ne iugent la charge est diuine.
Sera-ce assez que le Prince fasse Iustice par ses
Commis ? S’y fier entierement sans sçauoir s’ils s’en
acquittent equitablement, c’est mettre en grand hazard
l’estat de sa consçience, Louys IX. que nous
honorons comme vn Sainct, deuroit bien seruir d’exemple
à ses successeurs, qui ne cessoit point de rendre
iustice par sa propre bouche, quand il en estoit
requis, sçachant certainement que les Roys ne sont
tels que pour faire iustice, chastians les Meschans &
conseruans les bons, cause pourquoy ils sont appellez
Dieux & portent l’espée à leur costé, selon l’Apostre
aux Romains 13. Où auons nous pour cela vn
exemple depuis cet incomparable Roy, que le Prince
& luge souuerain se soit trouué aux assemblées
des Dieux de leurs Parlemens pour iuger ? nul, mais
bien souuent pour surcharger leurs peuples par des
nouueaux Edicts.

Le second remede qui est le conseil des Sages de
son Royaume, n’est point moins à desirer que le premier
quand le Roy est deuenu majeur. On n’a jamais
veu Monarque gouuerner & faire tout de puissance
absoluë sans conseil qu’il n’ait esté iugé temeraire.
Il n’y a que Dieu qui soit infaillible, d’autant qu’il
sçait tout, & qu’il peut tout ce qui ne peut estre communiqué
à aucune creature. Salomon estoit le plus
sage des Rois qui n’a point laissé de trãsgresser les loix