nous n’auons encor opposé que des respects, parce que
le Mazarin couure toutes ses injustices & ses tyrannies du nom
& de l’authorité du Roy : Nous n’auons iusques à present paré
ses coups qu’auec des larmes, des prieres & des remonstrances.
Ces Remonstrances tant de fois reïterées, ont plustost augmenté
l’insolence de ce Ministre, que touché le cœur de nostre jeune
Monarque. Ce perfide enchanteur nous a fait respandre autant
de sang que nous auons versé de larmes, & n’a payé enfin
les plus soûmises marques de nostre zele que de mespris & de
cruautez. Il a eludé les efforts des armes par de fausses promesses,
trompé nos Princes par ses negociations, & ruiné le peuple
par ses tyrannies. L’amour que nous portons à nostre Roy ne
nous doit pas faire repentir de cette conduite respectueuse, nos
souffrances ont marqué nostre fidelité, il faut maintenant que
nostre deffense marque nostre courage ; & puisque cette veneration
stupide que nous auons pour nostre Roy ne sert qu’à ruiner
son Royaume, & que tous les remedes que les Princes de
son Sang, ses Parlemens, & ses peuples luy ont presentez pour
la conseruation de sa Couronne & de son Estat, ont esté conuertis
en poisons par cét infame Ministre, qui corrompt toutes
ses bonnes inclinations ; Il est necessaire que nous changions
de conduite, & sans déraciner de nos cœurs ces semences d’amour
que nous gardons à nostre Roy, nous deuons nous animer
plus que iamais contre ce seducteur qui empoisonne son
ame toute Royale, & tient toutes ses pensées & ses passions captiues
sous son obeyssance. Faisons succeder les armes aux Remonstrances,
la force à la negociation, & l’vnion à la fourbe
& aux intrigues qui nous ont diuisé iusques à present. Ne declamons
point auec inconsideration contre la conduite de ce Parlement
illustre qui fait la premiere Compagnie du Royaume,
leurs Remonstrances ont esté iustes tant que nos esperances
ont eu quelque fondement. Ils doiuent estre tousiours considerez

Page précédent(e)

Page suivant(e)