d’autant qu’il en falloit chastier pour donner
exemple, & empescher les diuisions qui n’estoient
que trop vsitées, & qui donnoient désordre
à toutes choses. Autres de Messieurs
ont esté d’aduis de superseder à ce iugement
pour quelques iours, & representé qu au prejudice
des Arrests de la Cour portant defenses
de s’assembler, on contreuenoit à iceux
iournellement, mesmes Samedy dernier qu’il
y auroit eu vne Assemblée, en laquelle auoiẽt
assisté plusieurs Colonels de la Ville, que le
subiect de cette assemblée n’auoit encores
esté appris, & s’estant esleué vn grand bruit
entre plusieurs qui auroient dit, qu’il y auoit
des assemblées, les vnes illicites, & d’autres
non, à raison dequoy il estoit à propos auant
que d’entrer plus auant de sçauoir le subiect
de ses Assemblées,

C’est pourquoy pour deliberer sur toutes
les choses represantée en l’Assemblee, l’on
a remis icelle à Ieudy prochain, mesmes sur
la Response faicte par le Roy, aux Escheuins
& Procureurs de l’Hostel de Ville, qui seroient
venus en Parlement ce iour. Pour represanter
ladite Response du Roy.

FIN.