la ville sont, celuy de S. A. R. de Valois, d’Enguien,
de Conty, & de Languedoc.

Le Vendredy septiesme Iuin, Messieurs Deslandes
& Doujat, Deputez de la Cour, furent supplier
son Altesse Royale de se transporter au Parlement,
pour entendre les plaintes qui se font des
degasts causez par les trouppes estrangeres qui
sont aux enuirons de Paris ; de ce que Sadite Altesse
a souffert l’entrée desdites trouppes en France, &
aussi du reproche que Sa Majesté a enuoyé faire à
la Cour du canon que les assiegez d’Estampes ont
tiré auprés de sa Personne ; ausquels sieurs Deputez
Son Altesse Royale respondant auec sa promptitude
& presence d’esprit ordinaire, dit que les
trouppes de Monsieur de Lorraine ne faisoient aucuns
degasts, estant soudoyées aux frais & despens
de ce mesme Duc, qui auoit donné ordre de faire
cuire le pain pour leur subsistance.

Que pour l’entrée de ces Estrangers, il n’auoit
que suiuy l’exemple du Cardinal Mazarin, qui en
auoit fait entrer en plus grand nombre, & pour
vne cause bien moins juste, que celle pour la quelle
ceux-cy estoient venus.

Et qu’enfin au regard du canon tiré proche de
Sa Majesté, Sadite Altesse en auoit vn sensible ressentiment,
mais que la faute en deuoit estre imputée
à l’indiscretion de ceux qui auoient conduit sa
Personne si proche d’vne Ville, qui ne se defendoit
que pour son seruice.

FIN.