faite de tenir vne Conference, pour aduiser à ce qui est necessaire pour
le bien de la Paix generale & soulagement des Peuples ; Et oüy sur ce
les Gens du Roy, A ARRESTE’& ordonné, que ladite Conference
sera tenuë en lieu seur, tel qu’il plaira au Roy & à la Reyne Regente
Qu’a cette fin y assisteront quatre Presidens de ladite Cour, vn ou
deux des Generaux, deux Conseillers de la grand’Chambre, vn Conseiller
de chacune Chambre des Enquestes, & vn des Requestes, comme
aussi vn Maistre des Requestes, deux de chacune des Compagnies
Souueraines de cette Ville, Et le Preuost des Marchands, ou en son
absence l’vn des Escheuins ; Lesquels auront plain pouuoir de traiter
& resoudre ce qu’ils jugeront par leur prudence, & qui sera trouué
plus propre, vtile & conuenable pour le bien de l’Estat, soulagement
des Peuples, & particulierement de la Ville de Paris, authorité des
Compagnies, & conseruation des interests de ceux qui ont témoigné
fidelité & affection en cette occasion si importante, dont sera donné
aduis au sieur Duc de Longueville, ausdites Compagnies Souueraines
de Paris, aux Deputez des Parlemens de Roüen & d’Aix en Prouence,
& ausdits Preuost des Marchands & Escheuins : Et seront les Gens
du Roy deputez pour aller voir ledit Seigneur Roy, & ladite Dame
Reyne Regente, pour leur faire entendre le present arresté, & les supplier
de la part de ladite Cour, Que suiuant la parole donnée, les passages
soient ouuerts pour la liberté des choses necessaires en cette Ville,
Et ont esté deputez Messieurs les Premier President, de Mesmes second
President, le Cogneux & de Nemont, aussi Presidens : De Longueuil
& Menardeau, Conseillers de la Grand’Chambre : De la Nauue,
le Cocq, Bitault, P. Viole & Pallau, des Enquestes, Et le Févre
des Requestes.

Du Lundy premier iour de Mars mil six cens quarante-neuf.

CE iour, la Cour, toutes les Chambres assemblées, Maistre
Guillaume Brissonnet Conseiller & Maistre des Requestes,
a esté deputé pour l’execution de l’arresté du jour d’hier.

Signé, DV TILLET.