ordinaire, & de paroistre sans eux aux pieds de
Vostre Majesté pour luy presenter nos vœux, nos respects
& nos soumissions ; Et comme nostre office est
plustost destiné à l’action, que pour la parole, nous aurions
attendu par leur entremise l’honneur de vos
commandemens, & nostre prompte obeïssance auroit
esté le seul langage qui vous auroit entretenu de
nostre fidelité.

Il est vray que lors que nous considerons que Vostre
Majesté est le centre où aboutissent toutes les lignes
de ce grand Cercle ; que les cœurs de tous nos habitans
vont incessamment vers vous, & qu’on peut
dire qu’ils sont plus veritablement dans vostre Cour
que dans l’enceinte de nos murailles où ils ne songent
qu’à rapeller le vostre, nous estimons que c’est chercher
la Ville où elle est que de la chercher où vous
estes, que c’est ne faire qu’vn mesme corps auec elle,
que de se rendre au lieu où toutes ses parties sont si
agreablement reünies à leur principe, & que c’est encore
entrer parfaitement dans son esprit, voire dans
sa plus forte passion, que de suppléer à ses deuoirs que
les ordres de Vostre Majesté viennent d’interrompre.

Et qui est-ce qui y peut mieux satisfaire que nous, qui
portant la parole pour vn Corps lequel embrasse toute
la Ville, auons droit de parler pour elle, & qui nous
pouuons donner cét honneur de n’estre pas seulement
attachez à Vostre Majesté par le deuoir de nostre
naissance, & par la foy de nostre serment, mais
encore par vne obligation particuliere d’exposer pour
son seruice nostre sang & nos vies.