éuiter sans paroistre criminel ; & aux
bruits que l’on semoit dans Paris, qu’il
vouloit faire la Guerre Ciuile, l’auoient
empesché de s’acquiter d’vn deuoir, qu’il
auoit plus d’impatience de rendre, que
ceux qui l’en sollicitoient auec tant d’empressement :
Qu’il sçauoit à quoy sa naissance,
& son rang l’obligeoient, & que
ses obligations estoient trop auant dans
son cœur, pour s’en esloigner jamais sous
quelque pretexte que ce puisse estre ; &
qu’il n’auoit pas besoin de paroles, puis
qu’il les auoit confirmées par tant d’effets
advantageux, & au despens de son propre
sang.

Surquoy Son Altesse Royale ayant pris
la parole, asseura que les soupçons de Monsieur
le Prince estoient raisonnables ; &
qu’il se faisoit beaucoup de choses au Palais
Royal, qui les augmentoient au lieu
de ses leuer, ayant repeté ce qui auoit esté
dit des voyages de Cologne, & du Mariage
de Monsieur de Mercœur : Et qu’il
estoit necessaire de pouruoir à la seureté