desquels sa qualité le dispense. Mais
le Sainct Pere & le sacré College, trop bien
informez de sa mauuaise conduitte, & ne
pouuant reuoquer en doute l’equité de cét
ilustre Senat, qui ne fait rien sans pleine connoissance
de cause, declara le dix-neuf de ce
mois, que ledit Arrest du Parlement de Paris
auoit esté valablement & legitimement
rendu, qu’elle abandonnoit ledit Cardinal
Mazarin au bras seculier, pour en subir les
peines, & que des à present elle le degradoit,
& le declaroit indigne de son tiltre & dignité
de Cardinal, à moins qu’en dedans deux mois
il ne comparut en Cour de Rome, pour se iustifier
sur tous les Chefs des crimes dont il est
accusé, Ie vous proteste, Monsieur, que cette
nouuelle ne fut pas plustost diuulguée en cette
ville, que non seulement les François qui y
sont, mais generalement tous les Estrangers,
& mesmes les Italiens, en témoignerent vne
ioye extréme, tant il est vray que les crimes
de ce commun ennemy, & les tyrannies qu’il
a exercées en France, sont des choses si parfaitement
conneuës de tout le monde, qu’il n’y
a personne qui n’en conçoiue de l’horreur,
& ne fasse des vœux pour sa perte.

En mesme temps que le Cardinal Mazarin