pourroit demander en saueur du Cardinal Mazarin sous le nom du
Roy qu’il vsurpe, & qu’elles ne manqueront pas de refuser passage
aux troupes qui leur pourroient venir, & d’arrester les deniers qu’ils
voudroient tirer des receptes des Prouinces: Et particulierement encore
elles sont inuitées de n’adiouster aucune creance aux nouuelles
qu’ils pourroient semer de leurs aduantages. Nous aurons vn soin
particulier de les tenir informées de la verité de tout ce qui arriuera, &
par ce moyen la France vnie & iointe en vn mesme interest, arrestera
dans son commencement vne guerre ciuile qui la menace d’vn embrasement
vniuersel, & le Cardinal Mazarin sera contraint de vuider le
Royaume, s’il veut éuiter la peine de ses attentats contre le repos
public & l’authorité du Roy.