& de nos soumissions iusques à la perte de nos
biens, & le hazard de nos vies. Et quand Dieu
donna vn Roy à son peuple il l’aduertit en méme
temps, qu’il se rendroit maistre de tout ce
qu’il possederoit, enfin il est iuste que nous respections
les Princes, & pour quelque raison
que ce soit ne s’esleuer iamais contre-eux. Vous
vous offencez en épousant la querelle de ces
Messieurs de ce que l’on dit, que leurs maisons
sont cimentées du sang des pauures, & basties
des despoüilles d’autruy. Respondez moy apres
la bourse des Princes, & de quelques Partisans
qui est vn peu remplie, qui possede tout l’argent
de France sinon eux à qui appartiennent
les plus riches Fermes, les plus superbes Chasteaux,
les plus belles Terres, & les meilleurs
fiefs nobles de la Campagne sinon à eux. Faites
comparaison de la maison du plus puissant Seigneur
du païs auec celle d’vn President il ny a
point, & assez souuent celle du Gentilhomme
n’est qu’vne Cabane à l’esgard de celle de monsieur
le Conseiller. Dites moy où trouuerez
vous apres les Princes & les Financiers qui ont
beaucoup, & qui n’ont rien d’asseuré, quelque
Seigneur pour puissant qui soit, qui possede
cent où six vingt mille liures de rente comme
fera vn monsieur du Parlement, & qui ait en
son Hostel cinq ou six Carrosse comme luy.

Page précédent(e)

Page suivant(e)