il s’interessoit fort ; s’offrit de seruir la compagnie
en toutes les occasions, accepta bien volontiers
le pain & le vin qui luy fut offert, qui sont
les presens dont l’Eglise se sert enuers Dieu mesme :
il dit que c’estoit Gregoire douze qui auoit estably
cette loüable coustume de faire offrir pain &
vin aux Ecclesiastiques.

Le lendemain Samedy sur les vnze heures le
Roy, accompagné de la Reyne & de Monsieur,
fit son entree dans l’Eglise par l’Euesché. Tous
les Chanoines estoient en ordre reuestus de chappes,
monsieur Amiot Doyen, qui fut autant consideré
pour sa rare vertu & son merite particulier,
que parce qu’il portoit la parole pour le Clergé &
le Chapitre, tenant vne petite Croix en sa main,
deux Chanoines à ses costez, qui ietterent aux
pieds de Leurs Majestez deux carreaux qu’ils tenoient,
& s’estant le Roy & la Reyne agenoüillez,
ledit sieur Doyen leur presenta l’Eau beniste &
apres la Croix, que Leurs Majestez baiserent ; &
cependant leur fut dit, que Leurs Majestez auoient
plus grande obligation d’adorer IESVS-CHRIST
que tous leurs subjets, pour autant que cette Majesté
Diuine s’estoit humiliée iusques à la mort de
la Croix, pour enseigner par son exemple à tous
leurs subjets à s’assuiettir & obeir à Leurs Majestez ;
que l’Eglise estoit depositaire de cette verité ;
qu’elle le preschoit tous les iours, & que Leurs
Majestez pouuoient entrer iusques au Sanctuaire