combien le sang Royal estoit cher & rare en France :
Qu’il vaudroit bien mieux employer la douceur,
que l’aigreur contre telles personnes. Tous
ces mouuements estants colorez d’vn pretexte
specieux pour conseruer l’authorité Royalle, &
de la reparation des desordres arriuez dans l’Estat,
laquelle couleur sembleroit tousiours
aux estrangers estre assistée de iustice, veu le
bas aage du Roy, & consideré le pouuoir que
la qualité dudit Seigneur Prince luy donne
en ce Royaume, & l’interest qu’il a à la conseruation
d’iceluy : Auquelles choses estant pourueu
le pretexte des mouuements estoit leué,
& Monseigneur le Prince mis en son tord, &
abandonné s’il ne mettoit les armes bas ; là où
iettant telles personnes aux extremitez, pour n’estre
pas satisfaits & honnorez comme il appartient,
& pour ne leur faire raison sur les desordres
qu’ils proposent l’Estat en souffre des pertes irreparables,
ainsi que la France auoit senti en la
disgrace du Duc Charles de Bourbon durant le
regne de François I & si l’on eut esté si vite disoient-ils,
quand la chaleur de plusieurs ennemis
du sang Royal vouloit faire mourir, comme criminels
de leze Majesté, le Roy deffunct & le pere
dudit Seigneur Prince en la iournée de S. Barthelemy ;
Ou seroit maintenant le Roy mesme & ledit
Seigneur Prince, lesquelles choses & plusieurs
autres rencontres, qui se trouuent en ce suiet

Page précédent(e)

Page suivant(e)