sur ce qu’il auoit declaré de la part de Mõsieur le Prince,
qu’il ne pouuoit prendre aucune confiance, ny
reuenir à la Cour, que les trois Creatures du Cardinal
Mazarin ne fussent esloignées ; Repetant qu’il
auoit crû que la Cõpagnie n’auoit qu’à voir ce qu’elle
auoit à faire sur cette seureté, que Monsieur son
Frere demandoit, estant inutile d’examiner les autres
que l’on proposoit, puis qu’on ne pouuoit pas leur
donner ce nom, parce qu’elles n’estoient que les mesmes
asseurances ; contre la foy desquelles il auoit souffert
la plus rigoureuse & la plus injuste oppression qui
fut jamais ; que Mõsieur son Frere & luy auoient esté
arrestez au prejudice de deux Declarations authentiques ;
que pour les persecuter on auoit violé des paroles,
desquelles mesme Monsieur le premier President
auoit esté le depositaire, qu’ils ne pouuoient
donc attẽdre qu’vne fortune pareille, tant qu’ils verroient
à la Cour des gens qui monstroient par leur
conduite, qu’ils auoient pris le Card. Mazarin pour
leur modele, aussi bien que pour leur Maistre & leur
Protecteur ; qu’ils deuoient estre persuadez, que puis
qu’ils auoiẽt esté capables de luy cõseiller toutes sortes
de violences pour affermir sa Tyrannie, ils le porteroiẽt
pareillement aux mesmes extremitez pour le
restablir, contre des personnes qui seront toûjours les
plus grands obstacles à son retour ; Que c’estoit par
cette consideration, que leur éloignement faisoit esgalemẽt
la seureté de Monsieur le Prince, & celle de
tout le Royaume ; puis qu’il estoit tres-certain, que
la tranquillité publique estoit incompatible, mesme

Page précédent(e)

Page suivant(e)