Au prejudice de ses deffenses & des ordres dõnez,
tant par S. A. R. Messieurs du Parlement, qu’Hostel
de Ville, à ce qu’elles fussent executées & obseruées,
à l’effect d’empescher qu’il n’arriue diuision & sedition
entre les Bourgeois & habitans de Paris. La nuict du
Vendredy venant au Samedy 28. Septembre le sieur
Frezon Thresorier de France en la Generalité de Paris,
demeurãt ruë de la Calende proche le Palais, Capitaine
du quartier qui estoit mõté en garde, sur l’heure
de minuit faisant la Ronde, ou quoy que ce soit, la
Patroüille, auroit auec les soldats qui l’assistoient, fait
rencontre en la ruë S. Martin de quelques hommes
qui auoient des eschelles, & autres instruments, lesquels
exposoient des placards aux Carrefours de
toutes les rües, tendant à émotion & sedition.

Ledit sieur Frezon les auroit fait arrester, & faict
saisir tous les imprimez desquels ils estoiẽt porteurs,
qui estoient intitulez au haut d’iceux du Tiltre DE
PAR LE ROY, Et plus bas, Declaration du Roy
portant Amnistie generale à tous les bons Bourgeois de
Paris, pour raison de tous les Mouuemens presens, Et au
dessous, signé, LOVIS, & plus bas, Deguenegaud,
sans que par lesdits imprimez il y aye adresse à aucuns
Iuges pour la verification.

Apres que lesd. hommes furent arrestez & interrogez
qui estoit l’Imprimeur qui auoit imprimé ce
qu’ils portoient, ils auroient confessé & enseigné l’endroit
où cela s’estoit imprimé, & s’y estans transportez