qui peuuent absolument disposer de leurs volontez,
comme bon leur semble.

Moy qui n’ay point d’autre interest que celuy du
public, & qui ne vise qu’a la satisfaction commune,
& du Prince & du Peuple, ie respons à ces obiections,
qu’il n’est pas iuste qu’vn seul homme possede absolument
l’esprit du Souuerain, & les affaires de toute
vne Monarchie ; parce qu’il n’y a point d’homme au
monde, qui n’abuse de l’authorité que son Maistre
luy donne, pour auoir la vanité de se faire voir puissant,
pour s’acquerir vn nombre infiny de tresors,
pour auancer ses parens & ses adorateurs, pour se
faire reuerer de tous ceux qui l’approchent, & pour
le mettre tout à fait la Couronne sur la teste, s’il le
peut faire auec impunité, & sans en estre repris de
personne.

Agatocles, fils d’vn Potier, s’empara bien du Royaume
de Sicile. Andronic s’éleua bien par son infidelité
à l’Empire de Constantinople. Burdenel s’appropria
bien iniustement vne partie de l’Espagne. Crescentius
vsurpa bien la puissance Consulaire & Tribunaire
à Rome. Denis se rendit bien Maistre de l’Estat de
Syracuse. Leutychides se fit bien Roy de Sparte. Periander
se saisit bien de Corinthe : & Tryphon enuahit
bien le royaume de Syrie.

Que ne fit pas Seianus, Fauory de Tibere, contre
vn Prince qui l’auoit éleué dans des honneurs & dans
des charges incroyable ? Il fallut que la ruine de l’Estat
fut le fondement de sa perte, aussi bien que celuy
de sa prodigieuse fortune.

Catilina apres auoir esté mis au plus haut faiste de
la fortune, par vn Peuple qui s’estoit rendu Maistre
de toute la terre, ingrat à tant de faueurs qu’il en auoit
receuës, n’extermina-t’il pas le Senat ? Ne dissipa
t’il pas les tresors publics ? & ne renuersa-t’il pas
toute la Republique ?