il se despoüille de ses benefices en faueur de ceux qui
ont besoin de recompense. Car il n’y a pas trop d’apparence
qu’il ayt de grands thresors en Italie, où il y a si long temps
que nous auons vne guerre, où il alloit de son honneur aussi
bien que de celuy de la France, qu’il est à presumer que tout
ce qu’on y a enuoyé, y a esté consommé ; & qu’il a fallu mesme
trouuer du credit par delà ce que l’on y a enuoyé. Et il n’est
pas raisonnable de compter ce qu’il auoit deuant que d’estre
premier Ministre chez nous : ce qui n’estoit pas si peu de chose,
qu’il ne fust capable de luy faire entretenir vne despense plus
honorable que celle des Cardinaux les plus accommodez.
Comme il n’est pas iuste non plus de murmurer s’il a quelques
bienfaits du Roy, ne pouuant faire moins que de viure
de l’Autel qu’il sert auec tant de peine ; & s’il fait des alliances
auec des Princes qui le souhaitent, & qui y trouuent leur
compte. Les mariages estans des manieres d’auancer ses parens,
qui ne sont nullement à la foule du peuple, & n’estant
point honteux à quelque Grand que ce soit, d’espouser des
filles qui sont des meilleures maisons de Rome, & qui ne
cedent qu’à ces quatre premieres qui sont du temps de la Republique.

Si apres tout cela ennuyé de seruir vne terre qui n’a que de
l’ingratitude pour les grands seruices qu’il luy rend, il vouloit
se retirer dans celle où il tient vn rang assez considerable.
Pourrions-nous mettre à sa place quelqu’vn qui sceust establir
au dehors les affaires de la France dans le credit où il les
a mises, & entretenir au dedans vne si grande correspondance
dans la maison Royale, comme celle qui y est à present ? Ne
sçait-on pas bien à quelles intrigues ces changemens-là donnent
matiere ? Et est-on asseuré que toutes les cabales conuinssent
en vn autre aussi bien qu’en celuy-cy ? Et qu’vn nouueau
venu eust l’authorité de les balancer dans les occasions,
& l’adresse de le faire auec succez ? cõme il a fait en vn temps,
où toute la prudence humaine auroit iuré qu’il n’en viendroit
iamais à bout ? Et ne pourroit-on pas raisonnablement apprehender
qu’il n’arriuast en France, apres qu’elle auroit perdu
le Cardinal Mazarin, ce qui arriua dans l’Empire Romain
apres qu’il eust perdu Crassus* ? Pompée ne pouuoit rien