estre si extreme que celle de ces premiers Peres, en
façon quelconque. La leur estoit infinie, parce qu’elle
s’adressoit à la mesme infinité, & par consequent la
punition en deuoit estre eternelle. Et celle dont on
nous accuse, ne se sçauroit estendre, au pis aller que
sur la vie temporelle.

Mais, au nom de Dieu, MADAME, que cette
grande & extraordinaire pieté que vous auez enuers
ce diuin Sauueur de nos ames, vous oblige à l’imiter
en toutes choses. Redonnez-nous vostre cher Fils,
auec vne pareille amour, que ce diuin Seigneur nous
donne le sien, pour nous chastier, comme il chastia
nos anciens peres, ses seruiteurs, dautant ou plus
dangereux pecheurs que nous ne sommes pas, & que
nous ne sçaurions estre ; & vous remettrez toute cette
Monatchie, dans vne splendeur, qui n’en eut iamais
de pareille. C’est vne tres-humble supplication
que toute la France vous fait, & que vous luy deuez
octroyer ; puis que c’est au nom du Roy des Roys
qu’elle vous le demande.

Vostre Majesté sçaura, s’il luy plaist, MADAME,
que c’est vn present que le Ciel nous a fait, par vostre
entremise. Les Roys sont plus à leurs subjets, qu’à
ceux, qui les ont mis au nombre des estres. Comme
fils, il vous a esté donné de Dieu : mais comme Souuerain
il a esté destiné pour son Peuple. Comme Roy,
c’est vn thresor qui nous appartient : mais comme issu
de vos flancs, il vous doit absolument obeïr, iusques
à ce qu’il soit en estat de prendre le soin de nos affaires.
Et vous deuez sçauoir, MADAME, qu’il n’est
pas moins l’ame de l’Estat, que l’obiet de toutes vos
pensées, & que le siege de l’ame ne peut estre que le
cœur, selon les sentimens des plus experts en la connoissance
de ces matieres. Si cela est, comme il n’en
faut pas douter (attendu que c’est le premier viuant,
& le dernier mourant :) le siege du Roy ne sçauroit